habaru page ad two

ރައީސުލްޖުމްހޫރިއްޔާ ޑރ. މުހައްމަދު މުއިއްޒު، މާލޭގެ ހެންވޭރުގައި ދިރިއުޅުއްވާ ރައްޔިތުންނާ ބައްދަލުކުރެއްވުމަށް މާދަމާ (ޑިސެމްބަރު 7) ވާ ބުރާސްފަތި ދުވަހުގެ ރޭ ހަމަޖެހިއްޖެއެވެ. މި ބައްދަލުވުން އޮންނާނީ ރޭ 20:30 ގައި ކަލާފާނު ސްކޫލްގައެވެ.

ރައީސް އޮފީހުގެ ތަރުޖަމާނު، ހީނާ ވަލީދު "އެކްސް"ގައި ކުރެއްވި ޕޯސްޓެއްގައި ވިދާޅުވީ، ރައްޔިތުންނާ ގާތުން ބައްދަލުކުރައްވައި، އެކި ކަންކަމުގައި ރައްޔިތުންގެ ޚިޔާލާއި މަޝްވަރާ ހޯއްދެވުމަށާއި، ރައްޔިތުން ކަންބޮޑުވާ ކަންތައްތަކާއި ޙިއްސާކުރައްވަން ބޭނުންފުޅުވާ ކަންކަން ސީދާ އަޑު އެއްސެވުމަށް ރައީސް މުއިއްޒު ބާއްވަވާ ސިލްސިލާ ބައްދަލުވުންތަކުގެ ތެރެއިން، ހެންވޭރުގެ ރައްޔިތުންނާ ބައްދަލުކުރެއްވުން މާދަމާ އޮންނާނެ ކަމަށެވެ.

ތަރުޖަމާނު ހީނާ ވަލީދު ވަނީ މި ބައްދަލުވުމަށް ހެންވޭރުގައި ދިރިއުޅުއްވާ ހުރިހާ ރައްޔިތުންނަށް ދައުވަތު އަރުވާފައެވެ.

މާލޭގެ ވަކިވަކި އަވަށްތަކަށް އަމާޒުކޮށް މިފަދަ ބައްދަލުވުންތަކެއް ބާއްވަވަން ނިންމަވާފައިވާކަން ރައީސް ޑރ. މުއިއްޒު އިއުލާން ކުރެއްވީ ސަރުކާރަށް ދެ އަހަރުވީ ދުވަސް ކަމަށްވާ މިދިޔަ ނޮވެމްބަރު މަހުގެ 17 ގައެވެ. އެފަހުން، ރައީސް ވަނީ ވިލިމާލެ، މާފަންނު އަދި މައްޗަންގޯޅީގެ ރައްޔިތުންނާއި މިހާތަނަށް ބައްދަލުކުރައްވާފައެވެ. މި ބައްދަލުކުރެއްވުންތަކުގައި ރައްޔިތުންގެ ސުވާލުތަކަށް ޖަވާބު ދެއްވައި، ރައްޔިތުންގެ ޝަކުވާތައް ރައީސް ގެންދަވަނީ ސީދާ އަޑުއައްސަވަމުންނެވެ.

ރައީސް ޑރ. މުއިއްޒު ވެރިކަމުގެ ހުވާ ކުރެއްވުމަށް ފަހުގައި އެމަނިކުފާނު ވަނީ ރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގެން، އެ ރަށްރަށުގެ ރައްޔިތުންނާއި ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކާއި މުއައްސަސާތަކުގެ ވެރިންނާ ބައްދަލުކުރައްވައިފައެވެ.

ރައީސް މާދަމާ ރޭ ހެންވޭރު ރައްޔިތުންނާ ބައްދަލުކުރައްވަނީ

ހުޅުމާލޭގެ މަގުތަކާއި ހުސްބިންތަކުގައި ގަވާއިދާ ހިލާފަށް ގިނަ ދުވަސްވެފައިވާ އުޅަނދުތައް ނަގައި، މަގުތައް ތަރުތީބުކުރުމުގެ ބޮޑު އޮޕަރޭޝަނެއް މިއަދު ފަށައިފިއެވެ. މޯލްޑިވްސް ޕޮލިސް ސަރވިސްއިން މަޢުލޫމާތު ދެއްވާ ގޮތުގައި، މި މަސައްކަތަކީ ހުޅުމާލެއަށް ދިމާވެފައިވާ ޕާކުކުރުމުގެ ދަތިކަން ހައްލުކޮށް، މަގުތަކުގެ ތަރުތީބު ރަނގަޅުކުރުމަށް ކުރިއަށްގެންދާ މަސައްކަތެކެވެ.

މި އޮޕަރޭޝަން ރަސްމީކޮށް އިފްތިތާޙުކުރުމުގެ ގޮތުން މިއަދު ހެނދުނު ހުޅުމާލެ ފޭސް 2 ޕޮލިސް ޓޯވޔާރޑް ކައިރީގައި ބޭއްވި ރަސްމިއްޔާތު ޝަރަފްވެރިކޮށްދެއްވީ ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ. މި ރަސްމިއްޔާތުގައި ކޮމިޝަނަރ އޮފް ޕޮލިސް އިސްމާޢީލް ނަވީން އާއި ހައުސިންގ ޑެވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިންގ ޑިރެކްޓަރ އާއި ހުޅުމާލެ ޕޮލިސްގެ ހެޑް އެސިސްޓަންޓް ކޮމިޝަނަރ އޮފް ޕޮލިސް އަޙްމަދު މުޙައްމަދު އާއި ފުލުހުންގެ ސީނިއަރ އޮފިސަރުން އަދި ސަރުކާރު ހިއްސާވާ އެކި ކުންފުނިތަކުގެ އިސްވެރިންނާއި މުވައްޒަފުން ބައިވެރިވެލެއްވިއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުޙައްމަދު އަމީން ފާހަގަކުރެއްވީ މަގުމައްޗަށް ގަވާއިދާ ހިލާފަށް އުޅަނދުތައް ދޫކޮށްލުމުން ޕާކުކުރުމާއި މަގު ބޭނުންކުރާ ފަރާތްތަކަށް ގިނަ ދަތިތަކެއް ކުރިމަތިވާކަމަށެވެ. އަދި ވިޔަފާރި އުސޫލުން ވިއްކުމަށް ގެންނަ އުޅަނދުތައްވެސް މިގޮތަށް މަގުމައްޗަށް ދޫކޮށްލާފައި ހުރުމުން ދަތިތަކާ ކުރިމަތިވަމުންދާކަން ފާހަގަކުރައްވައި، އެފަދަ އުޅަނދުތައް ނެގުމަށް އެދިވަޑައިގެންނެވިއެވެ.

ކޮމިޝަނަރ އޮފް ޕޮލިސް އިސްމާޢީލް ނަވީން ދެއްކެވި ވާހަކަފުޅުގައި، މި ޕްރޮގްރާމް ދެމެހެއްޓެނެވި ގޮތެއްގައި ކުރިއަށް ގެންދިއުމަކީ ވަރަށް މުހިންމު ކަމެއްކަން ފާހަގަކުރެއްވިއެވެ. އަދި މިކަމުގައި އެއްބާރުލުން ދެއްވާ ހުރިހާ ފަރާތްތަކަށް ޝުކުރު އަދާކުރެއްވިއެވެ.

މި އޮޕަރޭޝަން ކުރިއަށް ގެންދަނީ ފުލުހުންނާއި ދަތުރުފަތުރާއި މަދަނީ އުދުހުންތަކާ ބެހޭ ވުޒާރާ އާއި ދާހިލީ ސަލާމަތާއި ފަންނިއްޔާތާ ބެހޭ ވުޒާރާ ގުޅިގެންނެވެ. މީގެ އިތުރުން ހައުސިންގ ޑެވެލޮޕްމަންޓް ކޯޕަރޭޝަން (އެޗްޑީސީ)، ޕަބްލިކް ވޯކްސް، އެމްޑަބްލިއުއެސްސީ، އެސްޓީއޯ، ވެމްކޯ، އެމްޕީއެލް، ސްޓެލްކޯ، އާރުޑީސީ، އެމްޓީސީސީ އަދި އެމްއޭސީއެލް ފަދަ ސަރުކާރު ކުންފުނިތަކުންވެސް މި އޮޕަރޭޝަނުގައި ބައިވެރިވެއެވެ.

ޑިސެންބަރު 6 އިން 9 އަށް ކުރިއަށް ގެންދިއުމަށް ހަމަޖެހިފައިވާ މި އޮޕަރޭޝަނުގައި ހުޅުމާލެ ފޭސް 1 އަދި 2 ގެ މަގުތަކުގައާއި ހުސްބިންތަކުގައި ގަވާއިދާ ހިލާފަށް ޕާކްކޮށްފައިވާ އުޅަނދުތަކުގެ ތެރެއިން ގިނަ ދުވަސްވެފައިވާ އުޅަނދުތަކާއި، ރަޖިސްޓްރީ ނުކޮށް ބަހައްޓާފައިވާ އުޅަނދުތަކާއި، އޭ ޒޯން ފިޔަވައި އެހެން ޒޯންތަކަށް ރަޖިސްޓްރީ ކޮށްފައިހުރި އުޅަނދުތައް ޓޯވކުރުމަށް ވަނީ ހަމަޖެހިފައެވެ. މި އޮޕަރޭޝަންގެ މައިގަނޑު މަޤްސަދަކީ ހުޅުމާލޭގެ މަގުތަކުގައި ދުއްވައި ހަދާ ފަރާތްތަކަށާއި، ޕާކްކުރާ ފަރާތްތަކަށް ހުރި ދަތިތައް ކުޑަކޮށް، ރައްކާތެރި މާޙައުލެއް ޤާއިމުކުރުމެވެ.

ހުޅުމާލޭގެ މަގުތައް ތަރުތީބުކުރުމަށް ގަވާއިދާ ހިލާފަށް ޕާކްކޮށްފައިވާ އުޅަނދުތައް ޓޯވކުރުމުގެ އޮޕަރޭޝަނެއް ފަށައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ދިވެހިރާއްޖޭގެ ޓޫރިޒަމާބެހޭ ޤާނޫނު (ޤާނޫނު ނަންބަރު 99/2) އަށް 16 ވަނަ އިޞްލާޙު ގެނައުމުގެ ބިލު، މިއަދު ތަސްދީޤުކުރައްވައިފިއެވެ.މި ބިލު ތަސްދީޤުކުރެއްވުމާއެކު، ދިވެހިސަރުކާރުގެ ގެޒެޓުގައި ޝާއިޢުކުރައްވައި، މިހާރު ވަނީ މި ޤާނޫނަށް ޢަމަލުކުރަން ފަށާފައެވެ. ރައީސް އޮފީހުން ޢާންމުކުރެއްވި މަޢުލޫމާތުގައިވާ ގޮތުން، މި ޤާނޫނުގެ ދަށުން ރިސޯޓްތަކުގެ ކުލީގެ މުއްދަތު އިތުރުކުރުމަށް ފީއެއް ނަގާ ގޮތަށް އުސޫލުތަކެއް ވަނީ ކަނޑައަޅާފައެވެ.

މި ބިލަކީ، 2025 ޑިސެންބަރު 3 ވީ ބުދަ ދުވަހު ބޭއްވެވި 20 ވަނަ ރައްޔިތުންގެ މަޖިލީހުގެ 2025 ވަނަ އަހަރުގެ ތިންވަނަ ދައުރުގެ 28 ވަނަ ޖަލްސާއިން ފާސްކުރައްވާފައިވާ ބިލެކެވެ.މި ބިލު ހުށަހެޅުމުގެ ބޭނުމަކީ، ދައުލަތުގެ ކުންފުންޏަކަށް ޓޫރިސްޓް ރިޒޯޓް ހެދުމަށް ތަންތަން ކުއްޔަށްދޫކުރުމާއި، ޓޫރިޒަމް ޓްރޭނިންގ ރިޒޯޓު ހެދުމަށް ތަންތަން ކުއްޔަށްދޫކުރުންފަދަ ކަންކަމަށް ތަންތަން ކުއްޔަށްދިނުމާއި، އެ ތަންތަން ހިންގުމުގެ އުސޫލުތައް ކަނޑައެޅުމެވެ. އަދި ޤާނޫނަށް ގެންނަންޖެހޭ އިޞްލާޙްތައް ބަޔާންކުރުން ވެސް ހިމެނެއެވެ. މީގެ އިތުރުން، ރިޒޯޓު ހެދުމަށް ކުއްޔަށްދޫކޮށްފައިވާ ތަންތަން ތަރައްޤީކުރުމަށް ދެވޭ މުއްދަތު އިތުރުކުރުމާއި، ފަތުރުވެރިކަމުގެ ބޭނުމަށް ކުއްޔަށްދޫކުރެވޭ ރަށްރަށުގެ ފަޅުގެ ސަރަޙައްދު ކަނޑައެޅުމާއި، ޓޫރިޒަމާ ގުޅުންހުރި ދަތުރު ރާވައި ހިންގުމުގެ ޚިދުމަތް ދިނުމަށް ލައިސަންސް ދޫކުރުމާއި، އެ ލައިސަންސްގެ ދަށުން ޚިދުމަތް ދިނުމުގެ އުސޫލުތައް ޤާނޫނުގައި ބަޔާންކުރުން ވެސް މި ބިލުގައި ހިމެނެއެވެ.

މި ޤާނޫނުގެ ދަށުން، ޓޫރިސްޓް ޚިދުމަތް ދޭ ތަންތަނުގެ ގޮތުގައި "ޓޫރިޒަމް ޓްރޭނިންގ ރިޒޯޓް" ހިމަނައި، އެފަދަ ބޭނުންތަކަށް ތަންތަން ކުއްޔަށްދިނުމާއި، ތަރައްޤީކޮށް އެ ތަންތަން ހިންގުމުގެ އުސޫލު ބަޔާންކޮށްފައިވެއެވެ. މީހުން ދިރިއުޅޭ ރަށްރަށް ނުވަތަ ސިޓީތަކުގެ އިހްތިޞާޞްގައި ހިމެނޭ ތަންތަނުގައި ތަރައްޤީކުރެވޭނީ ޓޫރިސްޓް ގެސްޓްހައުސް ނުވަތަ ޓޫރިސްޓް ހޮޓާކަމަށް ކަނޑައަޅާފައިވާއިރު، އެ ތަންތަނުން ސަރުކާރަށް ދައްކާ ފައިސާ، އެ ތަނެއް ނިސްބަތްވާ ރަށުގެ ނުވަތަ ސިޓީގެ ކައުންސިލްގެ އާމްދަނީގެ ގޮތުގައި ހިމަނައި، އެ ފައިސާ އެ ކައުންސިލްތަކަށް ދިނުމަށް ވަނީ ކަނޑައަޅައިފައެވެ.

އިތުރަށް، ސަރުކާރުގެ ހިއްސާ އޮންނަ ކުންފުނިތަކުގެ ތެރެއިން މަދުވެގެން 45 އިންސައްތަ ހިއްސާ އޮންނަ ކުންފުނިތަކަށް ފަތުރުވެރިކަމާބެހޭ ކަންކަމަށް ރަށް، ބިން، ނުވަތަ ފަޅު ދޫކުރެވޭނެ ގޮތްތައް އިތުރުކޮށް، ޓޫރިސްޓް ރިޒޯޓެއް ނުވަތަ އިންޓަގްރޭޓަޑް ޓޫރިސްޓް ރިޒޯޓެއް ތަރައްޤީކުރުމަށް ރަށް ނުވަތަ ބިން ދޫކުރެވޭނެ ކަމަށްވެސް މި ބިލުގައި ވަނީ ހިމަނާފައެވެ.

މި ބިލުގައި ފަތުރުވެރިކަމުގެ ބޭނުމަށް ކުއްޔަށް ދޫކޮށްފައިވާ ތަން ތަރައްޤީކޮށް ނިންމުމަށް ދެވިފައިވާ މުއްދަތު އިތުރުކޮށްދިނުމުގެ ޝަރުތުތަކާއި އިޖުރާތު ބަޔާންކޮށް، ރަށެއް، ބިމެއް ނުވަތަ ފަޅެއް ކުއްޔަށް ދޫކުރެވިފައިވާ މުއްދަތު، އިތުރު 6 (ހައެއް) މަސްދުވަހަށް އިތުރުކުރެވޭނެކަމަށް ވެސް ވަނީ ހިމަނާފައެވެ.

ދިވެހިރާއްޖޭގައި ޓޫރިޒަމާ ގުޅުންހުރި ދަތުރު ރާވައި ހިންގުމުގެ ޚިދުމަތް ދެވޭނީ، ޓުއަރ އޮޕަރޭޓަރ ލައިސަންސް ލިބިފައިވާ ފަރާތްތަކަށް ކަމަށް މި ބިލުގައި ކަނޑައަޅާފައިވެއެވެ. އަދި ދިވެހިރާއްޖެއިން ބޭރުގައި ރަޖިސްޓަރީކޮށްފައިވާ ޓުއަރ އޮޕަރޭޓަރަކަށް، ޚިދުމަތް ދެވޭނީ ފޮރިން ޓުއަރ އޮޕަރޭޓަރ ލައިސަންސްއެއް ހޯދުމަށްފަހުކަމަށް ވެސް މި ބިލުގައި ބަޔާންކޮށްފައިވެއެވެ.

މީގެ އިތުރުން، ފަތުރުވެރިކަމުގެ ބޭނުމަށް ތަރައްޤީކޮށް ހިންގަމުންދާ ރަށެއް ނުވަތަ ބިމެއް ރީ-ޑިވެލޮޕްކުރުމަށްޓަކައި ބަންދުކުރެވޭ މުއްދަތުގައި ދައްކަންޖެހޭ ކުއްޔާއި، ބަންދުކުރުމާ ހަމައަށް ދައްކަންޖެހިފައިވާ ކުއްޔާއި ޖޫރިމަނާގެ ފައިސާ، ގަވާއިދުގައި ކަނޑައަޅާ ގޮތެއްގެމަތިން، ފަސްކޮށްދިނުމުގެ އިޚްތިޔާރު މިނިސްޓްރީއަށް ލިބިގެންވާކަމަށް ވެސް މި އިޞްލާޙުގައި ވަނީ ހިމަނާފައެވެ.

ހުއްދަ ހޯދައިގެން ފޯރުކޮށްދޭންޖެހޭ ޓޫރިސްޓް ޚިދުމަތެއް، އެ ލައިސަންސް ހޯދުމަކާ ނުލައި ފޯރުކޮށްދީފިނަމަ، އެ ފަރާތެއް ޚިދުމަތުގެ ބާވަތަށާއި ޚިދުމަތް ފޯރުކޮށްދިން މުއްދަތަށް ބިނާކޮށް 1,000,000 (އެއްމިލިއަން) ރުފިޔާއާ ހަމައަށް ޖޫރިމަނާ ކުރެވޭނެކަމަށް ވެސް މި ޤާނޫނުގައި ވަނީ ބަޔާންކޮށްފައެވެ.

ރިސޯޓްތަކުގެ ކުލީގެ މުއްދަތު އިތުރުކުރުމަށް ފީއެއް ނަގާ ގޮތަށް ޓޫރިޒަމް ބިލް ތަސްދީގުކުރައްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިސްލާމީ ޝަރީޢަތުގެ އަސާސްތަކާއި އެއްގޮތަށް ދިވެހިރާއްޖޭގެ ޒަކާތުގެ ނިޒާމު ހަރުދަނާކޮށް، ތަރުތީބުކުރުމުގެ މަޤްޞަދުގައި އެކުލަވާލާފައިވާ "ޒަކާތުގެ ބިލު" (ބިލު ނަންބަރު 30/2025)، މިއަދު ތަސްދީޤުކުރައްވައިފިއެވެ. ރައީސް އޮފީހުން ޢާންމުކުރެއްވި ބަޔާނެއްގައިވާ ގޮތުން، މި ޤާނޫނަށް ޢަމަލުކުރަން ފަށާނީ 2026 ޖަނަވަރީ 1 ވަނަ ދުވަހުން ފެށިގެންނެވެ.

މި ބިލު ރައްޔިތުންގެ މަޖިލީހުން ފާސްކުރައްވާފައިވަނީ، 20 ވަނަ ރައްޔިތުންގެ މަޖިލީހުގެ 2025 ވަނަ އަހަރުގެ ތިންވަނަ ދައުރުގެ 28 ވަނަ ޖަލްސާގައި، 3 ޑިސެންބަރު 2025 ވީ ބުދަ ދުވަހުއެވެ. މި ބިލުގެ މައިގަނޑު މަޤްޞަދަކީ، އިސްލާމްދީނުގައި ޒަކާތް ޝަރުޢުކުރައްވާފައިވާ މަޤްޞަދުތައް ހާޞިލުކުރެވޭނެ ގޮތެއްގެމަތިން، ދިވެހިރާއްޖޭގައި ޒަކާތް ދެއްކުމާއި ބަލައިގަތުމާއި، ޒަކާތުގެ ގޮތުގައި ލިބޭ މުދަލާއި ފައިސާ ބެހުމުގެ ކަންކަން ހިންގައި ބެލެހެއްޓުން ހަރުދަނާ ގޮތެއްގައި އިންތިޒާމުކޮށް، ޒަކާތުގެ ނިޒާމުގެ ޤާނޫނީ އޮނިގަނޑު ބަޔާންކޮށް، ޒަކާތާގުޅޭ ހަމަތަކާއި އުޞޫލުތައް ކަނޑައެޅުމެވެ.

މި ޤާނޫނަށް ޢަމަލުކުރަން ފެށުމާއެކު، ޒަކާތުގެ ގޮތުގައި ލިބޭ ފައިސާ އަމާނާތްތެރިކަމާއެކު ބަލަހައްޓައި، އެ ފައިސާ ޒަކާތުގެ ބެހެނިވެރިންނަށާއި ބޭނުންތަކަށް ދޫކުރުމަށް، އަދި އެ ފައިސާއިން އިސްލާމީ ޝަރީޢާ ހުއްދަކުރާ ގޮތުގެމަތިން އިންވެސްޓްކޮށް، ރަނގަޅު ފައިދާއެއް ހޯދައިދިނުމަށް ޓަކައި "ޒަކާތު ފަންޑު" ގެ ނަމުގައި ފަންޑެއް އުފެދުނީކަމަށް ބަޔާންކޮށްފައިވެއެވެ. މި ފަންޑު ބަލަހައްޓާނީ މާލިއްޔަތާބެހޭ ވުޒާރާއިން ކަނޑައަޅާ ގޮތެއްގެ މަތީން، ޕަބްލިކް ބޭންކް އެކައުންޓާ ވަކިން، މޯލްޑިވްސް މަނިޓަރީ އޮތޯރިޓީގައި ގާއިމުކުރެވޭ ވަކި އެކައުންޓެއްގައެވެ. ޒަކާތު ފަންޑުގެ ކަސްޓޯޑިއަންއެއްގެ ގޮތުގައި މަސައްކަތްކުރާނީ މޯލްޑިވްސް މަނިޓަރީ އޮތޯރިޓީންނެވެ.

ޒަކާތު ފަންޑު އުފެދުމާއެކު، ޤާނޫނު ނަންބަރު 2006/3 (ދައުލަތުގެ މާލިއްޔަތުގެ ޤާނޫނު) ގެ ދަށުން ޤާއިމުކޮށް ހިންގަމުން އައި "ޒަކާތު ފަންޑު" އެ ފަންޑުގައިވާ އެންމެހައި ފައިސާއާއެކު، މި ބިލުގައި ބަޔާންކުރާ ފަންޑަށް ބަދަލުވެގެން ދާނެއެވެ.

މި ޤާނޫނުގެ ދަށުން، ދިވެހިރާއްޖޭގައި ޒަކާތް ނެގުމާއި ޒަކާތުގެ ގޮތުގައި ލިބޭ މުދަލާއި ފައިސާ ބެހުން ހިމެނޭގޮތުން، ޒަކާތާބެހޭ ޤައުމީ ސިޔާސަތު ކަނޑައަޅުއްވާނީ، ޒަކާތާބެހޭ ކަންކަން ހިމެނޭގޮތުން، އިސްލާމްދީނާގުޅޭ ކަންކަން ހިންގައި ބެލެހެއްޓުމުގެ ޒިންމާ އެއިރެއްގައި ޙަވާލުކޮށްފައިވާ ސަރުކާރުގެ ވުޒާރާގެ ވަޒީރުގެ ލަފާފުޅާއެކު، ރައީސުލްޖުމްހޫރިއްޔާއެވެ. އަދި ދިވެހިރާއްޖޭގެ ޒަކާތުގެ ނިޒާމު ހިންގައި ބެލެހެއްޓުމުގައި މިނިސްޓަރަށާއި ޒަކާތު ހައުސްއަށް ލަފާ ދިނުމަށާއި، އެ ނިޒާމުގެ ހިންގުން ވިލަރެސްކުރުމަށްޓަކައި "ޒަކާތު ކައުންސިލް" ގެ ނަމުގައި ކައުންސިލެއް ރައީސުލްޖުމްހޫރިއްޔާ އެކުލަވާލަންވާނެކަމަށްވެސް މި ޤާނޫނުގައި ބަޔާންކޮށްފައިވެއެވެ.

މީގެ އިތުރުން، ޤާނޫނަށް ޢަމަލުކުރަން ފެށުމާއެކު، މިނިސްޓްރީގެ ދަށުން ހިންގާ އިދާރާއެއްގެ ގޮތުގައި "މޯލްޑިވްސް ޒަކާތު ހައުސް" ގެ ނަމުގައި، ސަރުކާރުގެ ވަކި އިދާރާއެއް އުފެދުނީއެވެ. އަދި ކުރިން މިނިސްޓްރީގެ ދަށުން ހިނގަމުންއައި، މޯލްޑިވްސް ޒަކާތު ހައުސްގެ އެންމެހައި މަސްއޫލިއްޔަތުތަކާއި ވާޖިބުތަކާއި، އެ އިދާރާގައި ބޭނުންކުރަމުންދިޔަ އެންމެހައި މުދަލާއި ވަސީލަތްތަކާއި ސަރުކާރުގެ ބަޖެޓުން އެ އިދާރާއަށް އެކަށައަޅައި ރައްޔިތުންގެ މަޖިލީހުން ފާސްކޮށްފައިވާ ފައިސާއާއި، ޤާނޫނީގޮތުންނާއި އެއްބަސްވުންތަކުގެ ދަށުން އެ އިދާރާއަށް ލިބިދޭ ޙައްޤުތަކާއި މަންފާތައް، މި ޤާނޫނުގައި ބަޔާންކުރާ މޯލްޑިވްސް ޒަކާތު ހައުސްއަށް ބަދަލުވާނެއެވެ.

ދިވެހިރާއްޖޭގެ ޒަކާތުގެ ނިޒާމު އެކުލަވައިލައި ހިންގުމާގުޅޭ ކަންކަމުގައި ޤާނޫނު ތަންފީޒުކުރާ ފަރާތްތަކަށް ޝަރުޢީ ލަފަޔާއި އިރުޝާދު ދޭނީ ރައީސުލްޖުމްހޫރިއްޔާ އެކުލަވާލާ ޝަރީޢާ އެޑްވައިޒަރީ ކޮމިޓީއަކުންނެވެ.

ރައީސުލްޖުމްހޫރިއްޔާ މި ބިލު ތަސްދީޤުކުރެއްވުމާއެކު ދިވެހިސަރުކާރުގެ ގެޒެޓުގައި މިއަދު ވަނީ ޝާއިޢުކުރައްވާފައެވެ.

ރައީސުލްޖުމްހޫރިއްޔާ، ޒަކާތުގެ ބިލު ތަސްދީޤުކުރައްވައިފި

"ވާނުވާ" ބަންދުގައި ނުވަތަ ޝަރީއަތް ފެށޭނެ ދުވަހެއް ނޭނގި ބަންދުގައި ބަހައްޓާފައި ތިބި ތިބުމުން 5 މިނެޓުން ހައްލުކޮށްދެއްވަން ވިދާޅުވެ، ކުރީގެ ރައީސް، އަބްދުﷲ ޔާމީން އަބްދުލްގައްޔޫމް އިންނެވީ 5 މިނެޓު ތާސްކުޅުމުގައި ކަމަށް ބާރަށު ދާއިރާގެ މެމްބަރު، އިބްރާހިމް ޝުޖާއު ވިދާޅުވެއްޖެއެވެ.

މެމްބަރު ޝުޖާއު މިފާޑުކިޔުން އަމާޒުކުރެއްވީ އިއްޔެ "އެކްސް" (ކުރީގެ ޓްވިޓަރ) ގައި ކުރެއްވި ޕޯސްޓެއްގައެވެ. އޭނާ ވިދާޅުވީ، އެންމެ ފުރަތަމަ ވެސް "ވާނުވާ" ބަންދު ތައާރަފްކޮށް، މި ބަންދުގައި ރައްޔިތުން ބައިތިއްބަން ފެށީ އެމްޑީޕީގެ ފުރަތަމަ ވެރިކަމުގައި އޭރުގެ ރައީސް މުހައްމަދު ނަޝީދު ކަމަށެވެ. އަދި 5 މިނެޓުން އެކަން ހައްލު ކުރެވޭނެ ކަމަށް ވިދާޅުވި ރައީސް ޔާމީންގެ ވެރިކަމުގައި މި މައްސަލަ އިތުރަށް ގޯސްވެގެން ދިޔަ ކަމަށް ޝުޖާއު ފާހަގަކުރެއްވިއެވެ.

އޭގެ ފަހުން ޖެހިގެން އައި އެމްޑީޕީގެ ވެރިކަމުގައި، އިބްރާހިމް މުހައްމަދު ސޯލިހުގެ ސަރުކާރުގައި ވެސް "ވާނުވާ" ބަންދަށް ހައްލެއް ހޯދުމުގެ ވިސްނުމެއް ނެތި، މީހުން މި ބަންދުގައި ބަހައްޓަމުން ދިޔަ ކަމަށް ޝުޖާއު ބަޔާންކުރެއްވިއެވެ.

"ވާނުވާ ބަންދުގެ ހައްލަކީ ފުނިޖެހިފައިވާ މައްސަލަތައް އަވަހަށް ނިންމޭނެ އިންތިޒާމް ޖުޑިޝަރީއަށް ފަހިކޮށް ދެއްވުމެވެ. 5 މިނެޓުން ހައްލުކޮށްދެއްވަން ވިދާޅުވި ރައީސް [ޔާމީން]ގެ ވެރިކަމުގައި ކްރިމިނަލް ކޯޓުގެ ސީލިން ވެއްޓުނީ ފަނޑިޔާރުންގެ ބޮލަށް. 5 މިނެޓް އިންނެވީ ތާސްކުޅުމުގައި. ކޯޓުތަކުގެ ފަނޑިޔާރުން ވިދާޅުވަމުން ގެންދެވީ މަސައްކަތް ކުރާނެ ފަހި މާހައުލެއް ނެތި މިއީ ހައްލު ހޯއްދަވަން ދަތިފުޅު މައްސަލައެއް ކަމުގައި،" ޝުޖާއު އޭނާގެ ޕޯސްޓުގައި ވިދާޅުވެފައިވެއެވެ.

ނަމަވެސް، ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވީ "ވާނުވާ" ބަންދަށް ހައްލު ހޯއްދަވައި ދެއްވާނެ ކަމުގެ ވައުދާއެކު ކަމަށާއި، އެ ހައްލަކީ ފަނޑިޔާރުންނަށް މަސައްކަތް ކުރެވޭނެ ފަހި މާހައުލަކާއި ވަސީލަތްތައް ފޯރުކޮށްދިނުން ކަމަށް ޝުޖާއު ވިދާޅުވިއެވެ. "މާލީ މިނިވަންކަން. ރައީސްގެ ވައުދާ އެއްގޮތަށް މިކަން ވަނީ ޖުޑިޝަރީއަށް މިހާރު ފަހިކޮށްދެއްވާފަ،" ޝުޖާއު ފާހަގަކުރެއްވިއެވެ.

މެމްބަރު ޝުޖާއު އިތުރަށް ވިދާޅުވީ، ރައީސް މުއިއްޒު ވެރިކަމަށް ވަޑައިގެންނެވި ފަހުން ވެސް ޤާނޫނާއި ގަވައިދުގެ ތެރެއިން "ވާނުވާ" ބަންދުގައި ތިއްބެވި ބައެއް ފަރާތްތައް ޓެގް އަޅުވައި ބަންދުން ވީއްލާފައި މިހާރު ވެސް ތިބޭނެ ކަމަށެވެ. ނަމަވެސް 5 މިނެޓުން މިކަން ކުރެވޭނެ ކަމަށް ވިދާޅުވި ރައީސް ޔާމީނަށާއި އެމްޑީޕީގެ ދެ ވެރިކަމުގައި އެވަރު ވެސް ކޮށްނުލެވުނު ކަމަށް ޝުޖާއު ހިތާމަފާޅުކުރެއްވިއެވެ.

"ވާނުވާ" ހައްލު ނުހޯދައި ޔާމީން އިންނެވީ ފަސްމިނެޓް ތާސްކުޅުމުގައި: ޝުޖާއު

ރ. މަޑުއްވަރީގައި 400 ކިލޯވޮޓް-ޕީ (kWp) ގެ ސޯލާ ޕީ.ވީ. ހައިބްރިޑް ނިޒާމެއް ޤާއިމުކުރުމުގެ މަސައްކަތް ފޯރިއާއެކު ކުރިއަށްދާ ކަމަށް ތިމާވެއްޓާއި ބެހޭ ވުޒާރާއިން ހާމަކޮށްފި އެވެ. މި މަޝްރޫޢުގެ ދަށުން 344 ކިލޯވޮޓް-އަވަރ (kWh) ގެ ބެޓެރީ އެނަރޖީ ސްޓޯރޭޖް ސިސްޓަމް (BESS) އެއް ވެސް ގާއިމުކުރެވޭނެ އެވެ.

ތިމާވެއްޓާއި ބެހޭ ވުޒާރާއިން ބުނީ، ރާއްޖޭގެ ރައްޔިތުންނަށް ދެމެހެއްޓެނިވި އަދި ތިމާވެއްޓާ ރައްޓެހި ހަކަތަ ފޯރުކޮށްދިނުމަށް ސަރުކާރުން ކުރަމުންދާ މަސައްކަތްތަކުގެ މުހިންމު ބައެއްގެ ގޮތުގައި މި މަޝްރޫޢު ހިންގަމުންދާ ކަމަށެވެ. މި ނިޒާމް މަސައްކަތްކުރަން ފެށުމާއެކު، އަހަރަކު 187,902 ލީޓަރުގެ ޑީޒަލް ބޭނުންކުރުން ކުޑަކުރެވޭނެ ކަމަށް ލަފާކުރެވޭއިރު، 460 ޓަނުގެ ކާބަން ޑައިއޮކްސައިޑް (CO₂) ތިމާވެއްޓަށް ބޭރުވުން މަދުކުރެވޭނެކަމަށް ވެސް އެވުޒާރާއިން ވަނީ ހާމަކޮށްފައެވެ. މިއީ ރާއްޖޭގެ ތިމާވެށި ރައްކާތެރިކުރުމަށާއި، ކާބަން ބޭރުކުރާ މިންވަރު ކުޑަކުރުމަށްޓަކައި ސަރުކާރުން އަޅާ ވަރަށް މުހިންމު ފިޔަވަޅެއް ކަމަށް ވެސް ވުޒާރާއިން ސިފަކޮށްފައިވެއެވެ.

މި މަޝްރޫޢަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިޝަން ހާސިލްކުރުމަށް އެޅުނު މުހިންމު ފިޔަވަޅެކެވެ. ރައީސް ޑރ. މުޢިއްޒުގެ ވިޝަންގައިވާ ގޮތުން، 2028 ވަނަ އަހަރުގެ ނިޔަލަށް، ރާއްޖޭގައި ކަރަންޓު އުފެއްދުމުގެ 33 އިންސައްތަ އިއާދަކުރަނިވި ހަކަތައިން ހޯދުމަށް ސަރުކާރުން ވަނީ އަމާޒު ހިފާފައެވެ. މިކަމަށްޓަކައި ރާއްޖޭގެ އެކި ކަންކޮޅުތަކުގައި މިފަދަ ބޮޑެތި މަޝްރޫޢުތައް ހިންގުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ.

ރ. މަޑުއްވަރީގައި މި ނިޒާމް ޤާއިމުކުރުމުން، ރަށުގެ ކަރަންޓު ޚަރަދު ކުޑަވެ، ރައްޔިތުންނަށް ލިބޭ ހަކަތަ އިތުރަށް ހަމަޖެހިގެންދާނެ ކަމަށް ސަރުކާރުން އުންމީދުކުރެއެވެ. މިފަދަ މަޝްރޫޢުތަކުގެ ސަބަބުން، ދިވެހިރާއްޖެއަކީ ދެމެހެއްޓެނިވި ހަކަތައިގެ މައްޗަށް ބަރޯސާވާ، ތިމާވެއްޓާ ރައްޓެހި ޤައުމަކަށް ހެދުމަށް މަގުފަހިވާނެ ކަމަށް ވެސް ތިމާވެއްޓާއި ބެހޭ ވުޒާރާއިން ވަނީ ފާހަގަކޮށްފައެވެ.

މަޑުއްވަރީގައި 400 ކިލޯވޮޓް-ޕީގެ ސޯލާ ހައިބްރިޑް ނިޒާމެއް ޤާއިމުކުރުމުގެ މަސައްކަތް ކުރިއަށްދަނީ!

ފާއިތުވެދިޔަ ދެ އަހަރު އިސްލާމީ ހިދާޔަތާއި އިސްލާމީ ނޫރު ފެތުރުއްވުުމަށް ގިނަ މަސައްކަތްތަކެއް ކުރެވިފައިވާކަމަށް އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ އިސްލާމީކަންތައްތަކާ ބެހޭ ވުޒާރާއިން ބާއްވާ މީޑިއާ މައުރަޒު ހުޅުވުމަށް ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ. ވަޒީރު ވިދާޅުވީ، ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން އިސްލާމީ ނޫރާއި ހިދާޔަތު ފޯރުކޮށްދިނުމަށް ބޮޑެތި މަސައްކަތްތަކެއް ކުރެވިފައިވާކަމަށާއި މި މައުރަޒުގެ މަޤުސަދަކީ މިނިސްޓްރީން ކުރެވިފައިވާ ކަންކަން ރައްޔިތުންނާއި ހަމައަށް ގާތުން ފޯރުކޮށްދީ މިނިސްޓްރީގެ މަޢުލޫމާތު އާއްމުންނާއި މީޑިއާތަކާއި ހަމައަށް ގެނެސްދިނުންކަމަށެވެ.

ވަޒީރުގެ ވާހަކަފުޅުގައި ވަނީ މީޑިއާ މައުރަޒު ހުޅުވައިދެއްވުމަށްޓަކައި ރައްޔިތުންގެ މަޖިލީހުގެ ޢިއްޒަތްތެރި ރައީސް އޮނަރަބަލް ޢަބްދުއްރަޙީމް ޢަބްދުﷲ ވަޑައިގެންދެއްވިކަމަށްޓަކައި އެމަނިކުފާނަށް ޝުކުރު އަދާ ކުރައްވާފައެވެ.

އިސްލާމީކަންތައްތަކާ ބެހޭ ވުޒާރާގެ އިސްލާމިކް ސްޓޫޑިއޯއިން އިސްނަގައިގެން ވުޒާރާގެ ސެކްޝަންތަކާއި ގުޅިގެން ކުރިއަށް ގެންދާ މީޑިއާ މައުރަޒަކީ ސެކްޝަންތަކުން ކުރިއަށް ގެންދާ މަސައްކަތްތަކުގެ މަޢުލޫމާތާއި، ކުރެވެމުންދާ މުހިއްމު މަސައްކަތްތަކާއި މަޝްރޫޢުތަކާއި ގުޅޭ މަޢުލޫމާތު އާއްމުންނާއި މީޑިއާތަކަށް ވީހާވެސް ގާތުން ފޯރުކޮށްދިނުމަށް ކުރިއަށް ގެންދެވޭ މައުރަޒެކެވެ.

މި މައުރަޒުގެ އެކި ސްޓޯލްތަކުން ކުޑަކުދިންނާއި ގުޅޭ ޝައުޤުވެރި އެކި ހަރަކާތްތައްވެސް ކުރިއަށް ގެންދާކަން ފާހަގަކޮށްލެވެއެވެ. އެގޮތުން މޮސްކު މެނޭޖްމެންޓް ސެކްޝަނުން، މިމްބަރުގައި ޚުޠުބާ ކިޔުމުގެ ފުރުސަތު ތުއްތު ކުދިންނަށް ލިބޭނެ އިންތިޒާމް ވަނީ ހަމަޖައްސާފައެވެ.

މީޑިއާ މައުރަޒު މިއަދު ހެނދުނު 10:00 އިން ހަވީރު 18:00 އާއި ހަމައަށް މައުރަޒު ކުރިއަށްދާނެއެވެ.

މި މައުރަޒުގައި ޒުވާން ޚަޠީބުން ތަމްރީން ޕްރޮގުރާމުގެ ފަސް ވަނަ ބުރުގައި ރަޖިސްޓްރީވުމުގެ ފުރުސަތުވެސް ވަނީ ހުޅުވާލެވިފައެވެ. މީގެ އިތުރުން ޝައިޚުންނާއި ކުރަން ބޭނުންވާ ސުވާލުތައް ފަސޭހަކަމާއެކު ކުރެވޭނެ އިންތިޒާމްވެސް ހަމަޖެހިފައިވެއެވެ.

ފާއިތުވެދިޔަ ދެ އަހަރު އިސްލާމީ ހިދާޔަތާއި އިސްލާމީ ނޫރު ފެތުރުއްވުުމަށް ގިނަ މަސައްކަތްތަކެއް ވަނީ ކުރެވިފައި – ވަޒީރު

ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން މޯލްޑިވްސް ބެޑްމިންޓަން އެސޯސިއޭޝަން (ބީއޭއެމް) ގެ މައްޗަށް އެޅުނު ސަސްޕެންޝަން ރަސްމީކޮށް އުވާލައިފިއެވެ. މި ނިންމުމާއެކު، ގިނަ މަސްތަކެއްގެ އިދާރީ ހަމަނުޖެހުންތަކަށްފަހު ދިވެހިރާއްޖެއަށް ބީޑަބްލިއުއެފްގެ ފުރިހަމަ މެންބަރުކަން އަލުން ވަނީ ލިބިފައެވެ.

މި ސަސްޕެންޝަން މޭމަހު އެޅުނުއިރު، އޭގެ އަސްލަކީ ދިވެހިރާއްޖޭގެ އޮލިމްޕިކް ކޮމިޓީއާއި ކޮމިޝަނާ އޮފް ސްޕޯޓްސް އިން ބީއޭއެމް ތިން މެންބަރުންގެ އެޑް-ހޮކް ކޮމިޓީއެއްގެ ދަށަށް ގެނައުމުންނެވެ. މިކަމުގެ ސަބަބުން ދިވެހި ކުޅިވަރުގެ އިދާރާތަކުން ބީއޭއެމްގެ ކަންކަމަށް ނުފޫޒު ފޯރުވާ ކަމަށް ބީޑަބްލިއުއެފްއިން ނިންމިއެވެ. މި ހަމަނުޖެހުންތައް ކުރިއަށް ދިޔައީ، ބީއޭއެމްގެ އެގްޒެކެޓިވް ކޮމިޓީގެ ދައުރު މިދިޔަ އަހަރުގެ މާޗް މަހު ހަމަވެފައިވުމުން ދިމާވި ދިގުދެމިގެންދިޔަ ދާޚިލީ މައްސަލަތަކަކާ ގުޅިގެންނެވެ.

މި މައްސަލަ ޙައްލުކުރުމަށްޓަކައި، ބީއޭއެމްގެ ކުރީގެ އިސްވެރިންނާއި، ދިވެހިރާއްޖޭގެ އޮލިމްޕިކް ކޮމިޓީއާއި، ބީޑަބްލިއުއެފްގެ ކަމާބެހޭ ފަރާތްތައް ހިމެނޭ ގުޅިފައިވާ ވޯކިންގ ގްރޫޕެއް ވަނީ އެކުލަވާލާފައެވެ. މި ގްރޫޕުން ވަނީ ބީއޭއެމްގެ ޤަވާއިދުތަކަށް ކާމިޔާބުކަމާއެކު އިސްލާޙު ގެނެސް، ނޮވެމްބަރު 1 ވަނަ ދުވަހު އެ ޤަވާއިދުތައް ރަސްމީކޮށް ބަލައިގެންފައެވެ. އަދި ނޮވެމްބަރު 22 ވަނަ ދުވަހު، ބީޑަބްލިއުއެފްގެ ބޭފުޅުންގެ ހާޒިރުގައި އިންތިޚާބެއް ބާއްވައި، އައު އެގްޒެކެޓިވް ކޮމިޓީއެއް ވަނީ ހޮވައިފައެވެ.

މި އިސްލާޙީ މަސައްކަތްތައް ނިމުމުން، ބީޑަބްލިއުއެފްގެ ކައުންސިލް ޑެލިގޭޓެޑް ގްރޫޕްއިން ވަނީ ބީއޭއެމްގެ މެންބަރުކަން އަލުން ދީފައި އަދި ދިވެހި ކުޅިވަރުގެ އިދާރާތަކުން ދިން އެހީތެރިކަން ފާހަގަކޮށްފައެވެ. މީގެ އިތުރުން، ކޮމިޝަނާ އޮފް ސްޕޯޓްސްއިން ވެސް މި ހަފްތާގައި ކުރިން ނިންމެވި ނިންމުން ބަދަލުކުރައްވައި، ބީއޭއެމްގެ ގައުމީ ދަރަޖަ އަނބުރާ ދެއްވައިފައެވެ.

މި ސަސްޕެންޝަންގެ ސަބަބުން ދިވެހިރާއްޖެއަށް ބައިނަލްއަޤްވާމީ ބެޑްމިންޓަން މުބާރާތްތަކުގައި ބައިވެރިވުމުގެ ފުރުސަތު ކުޑަވެފައިވި ނަމަވެސް، ފާއިތުވި މަސްތަކުގައި ކުޅުންތެރިންނަށް ލުއިތަކެއް ވަނީ ދެވިފައެވެ. ސަސްޕެންޝަން މުޅިން ނެގުމާއެކު، ދިވެހި ބެޑްމިންޓަން އަށް ބައިނަލްއަޤްވާމީ ފެންވަރުގައި ކުރިން ކުރަމުންދިޔަ މަސައްކަތްތައް އަލުން ކުރިއަށް ގެންދެވޭނެކަމަށް ބެލެވެއެވެ.

ބެޑްމިންޓަން ވޯލްޑް ފެޑެރޭޝަނުން ރާއްޖޭގެ ސަސްޕެންޝަން އުވާލައިފި: ފުރިހަމަ މެންބަރުކަން އަލުން ލިބިއްޖެ

މޯލްޑިވްސް ހައްޖު ކޯޕަރޭޝަންގެ ނަމުގައި އޮޅުވާލައިގެން ފޭކު މެސެޖުތައް ދައުރުކުރަމުންދާތީ އެކަމަށް ސަމާލުވުމަށް އެ ކޯޕަރޭޝަނުން މިއަދު ވަނީ އާންމުންނަށް އިލްތިމާސްކޮށްފައެވެ. މި މެސެޖުތައް ފޮނުވަނީ މަކަރާއި ހީލަތުން ފައިސާ ހޯދުމުގެ ގޮތުން ކަމަށް ހައްޖު ކޯޕަރޭޝަނުން ވަނީ ބުނެފައެވެ.

ހައްޖު ކޯޕަރޭޝަނުން ނެރުނު ބަޔާނެއްގައިވާ ގޮތުން، އެ ކޯޕަރޭޝަނުގެ ނަމުގައި އާންމުންގެ ފޯނުތަކަށް ފޭކު މެސެޖުތަކެއް ފޮނުވަމުންދާ ކަން ވަނީ ފާހަގަކުރެވިފައެވެ. މިގޮތުން، ހައްޖަށް ދިޔުމަށް އިތުރަށް ފައިސާ ދެއްކުމަށް ހައްޖު ދަތުރުގެ ޖާގަ ކަށަވަރުވާނެ ކަމަށް ބުނެ ފޭކު މެސެޖުތައް ފޮނުވާކަން އެ ކޯޕަރޭޝަނުން ވަނީ ފާހަގަކޮށްފައެވެ. މިކަމުގެ ސަބަބުން، ހައްޖަށް ދާން ބޭނުންވާ ފަރާތްތަކުން އޮޅުވާލުމެއްގެ ތެރެއަށް ވެއްދިދާނެ ކަމުގެ ކަންބޮޑުވުން ވަނީ ފާޅުކޮށްފައެވެ.

ހައްޖު ކޯޕަރޭޝަނުން ބުނެފައިވަނީ، ރާއްޖެއިން މީހުން ހައްޖަށް ގެންދިޔުމަށް އެ ކޯޕަރޭޝަނުން ކަނޑައަޅާފައިވާ އަގުތަކުގެ އިތުރަށް އެއްވެސް ފައިސާއެއް ނުނަގާނެ ކަމަށެވެ. އެހެންކަމުން، މިފަދަ މެސެޖުތަކަށް ނުވަތަ ފޯން ކޯލުތަކަށް އިތުބާރު ނުކުރުމަށް ވަނީ އިލްތިމާސްކޮށްފައެވެ.

"މަކަރާއި ހީލަތުން ފައިސާ ހޯދުމަށް ފޮނުވާ މިފަދަ މެސެޖުތަކާއި، ކުރާ ފޯން ކޯލުތަކަށް ސަމާލުވުމަށް އެންމެހާ ބޭފުޅުންގެ ސަމާލުކަމަށް ދަންނަވަން،" ހައްޖު ކޯޕަރޭޝަނުގެ ބަޔާނުގައި ބުނެފައިވެއެވެ.

އިސްލާމްދީނުގެ މާތް އަޅުކަމަކާ ގުޅުވައި މަކަރާއި ހީލަތުން ފައިސާ ހޯދަމުން މިދާ ކަންކަމަކީ ހައްޖު ކޯޕަރޭޝަނުން އިންތިހާއަށް ކަންބޮޑުވެ ހިތާމަކުރާ ކަމެއް ކަމަށް އެ ބަޔާނުގައި ފާހަގަކޮށްފައިވެއެވެ. އަދި އެ ކޯޕަރޭޝަނުން ވަނީ މިފަދަ ޖަރީމާތައް ހަރުކަށި އިބާރާތުން ކުށްވެރިކޮށްފައެވެ.

ހައްޖު ކޯޕަރޭޝަނުގެ ނަމުގައި ފޭކު މެސެޖުތައް ދައުރުކުރާތީ ސަމާލުވުމަށް އަންގައިފި

ޕީއެސްއެމުން އިސްނަގައިގެން ރާއްޖޭގެ ގިނަ މީޑިއާތަކަކާ ގުޅިގެން ކުރިއަށް ގެންދިޔަ "ސިލޯނާއެކު ދިވެހީން" ޓެލެތޯނަށް ލިބުނު 800،352 ޑޮލަރު ނުވަތަ 245 މިލިއަން ލަންކާ ރުޕީސް، މިއަދު ލަންކާ ސަރުކާރާ ހަވާލުކޮށްފިއެވެ. މި އެހީއަކީ ލަންކާއަށް އެރި ތޫފާން "ޑިޓްވާ" އަދި ބޯކޮށް ވާރޭ ވެހުމުގެ ސަބަބުން ހާލުގައި ޖެހިފައިވާ މީހުންނަށް އެހީވުމަށް ދިވެހި ރައްޔިތުން ދީފައިވާ އެހީއެކެވެ.

މި ޓެލެތޯން ކުރިއަށް ގެންގޮސްފައިވަނީ 29 ގަޑިއިރަށެވެ. ރާއްޖޭގެ 30 އަށް ވުރެ ގިނަ މީޑިއާތަކުން ބައިވެރިވި މި ޓެލެތޯންގައި، ރާއްޖޭގެ ހުރިހާ ރައްޔިތުންނާއި، ޖަމިއްޔާ ޖަމާއަތްތަކާއި، ކްލަބްތަކާއި، އޮފީސްތައް ފަދަ ހުރިހާ ފަރާތްތަކަށް ވަނީ ބައިވެރިވުމުގެ ފުރުސަތު ހުޅުވާލާފައެވެ. މިގޮތުން ކުންފުނިތަކާއި ވުޒާރާތަކާއި މުވައްސަސާތަކާއި ސަރުކާރުގެ ކުންފުނިތަކުންނާއި އަމިއްލަ ފަރާތްތަކުން ވަނީ މި ޓެލެތޯނަށް ބޮޑު އެހީތެރިކަމެއް ފޯރުކޮށްދީފައެވެ.

އެގޮތުން، މި ޓެލެތޯނަށް އެންމެ ބޮޑު އެހީތެރިކަމެއް ފޯރުކޮށްދިނީ ފުލުހުންނާއި ސިފައިންނެވެ. ފުލުހުންގެ ފަރާތުން 2.4 މިލިއަން ރުފިޔާ ހަދިޔާ ކުރިއިރު، ސިފައިންގެ ފަރާތުން އެއް މިލިއަން ރުފިޔާ ހަދިޔާ ކުރިއެވެ. ނޮވެމްބަރު 30 ވަނަ ދުވަހު ފެށި މި ޓެލެތޯނަށް ލިބުނު ފައިސާ ޕީއެސްއެމް އިން ފުރަތަމަ ހަވާލު ކުރީ ހާރިޖީ ވުޒާރާއާއެވެ. މިއަދު މި ފައިސާ ރަސްމީކޮށް ލަންކާއާ ހަވާލުކޮށްދެއްވީ ލަންކާގައި ހުންނަ ރާއްޖޭގެ ސަފީރު މަސްއޫދު އިމާދެވެ.

މި އެހީތަކުގެ އިތުރުން، ދިވެހި ސަރުކާރުން ހަދިޔާ ކުރި 25،000 ކޭސް މަސްދަޅުވެސް މިއަދު ލަންކާ ސަރުކާރާ ވަނީ ހަވާލުކުރައްވާފައެވެ. އަދި އޭގެ ކުރިން ދިވެހި ސަރުކާރުން ދިން 50،000 ޑޮލަރުވެސް ވަނީ ލަންކާއާ ހަވާލުކޮށްފައެވެ. މީގެ އިތުރުން، ރާއްޖޭގެ އެކި ކުންފުނިތަކުންވެސް ދަނީ ލަންކާއަށް އަމިއްލަ ގޮތުން ބޮޑު އެހީތެރިކަމެއް ފޯރުކޮށްދެމުންނެވެ.

ލަންކާ އަށް އެރި ތޫފާން "ޑިޓްވާ" ގެ ސަބަބުން ކުރިމަތިވި ކާރިސާގައި މަރުވި މީހުންގެ އަދަދު މިހާރު ވަނީ 607 އަށް އަރާފައެވެ. އަދި ވީނުވީއެއް ނޭނގި ގެއްލިގެން ހޯދަމުން އަންނަ މީހުންގެ އަދަދު ވެސް ވަނީ 200 އަށް ވުރެ މައްޗަށް އަރާފައެވެ.

"ސިލޯނާއެކު ދިވެހީން" ޓެލެތޯނަށް ލިބުނު 8 ލައްކަ ޑޮލަރު ލަންކާއާ ހަވާލުކޮށްފި

ސްރީލަންކާއަށް ކުރިމަތިވި މޫސުމީ ކާރިސާއިން އަރައިގަތުމަށް މަސައްކަތް ކުރަމުންދާ މި ދަނޑިވަޅުގައި، ދިވެހިރާއްޖެއިން ފޯރުކޮށްދިން ދީލަތި އެހީތެރިކަމަށް ލަންކާގެ ރައްޔިތުންނާއި ރާއްޖޭގައި ދިރިއުޅޭ ލަންކާ ރައްޔިތުން ހިތުގެ ފުންމިނުން ޝުކުރު އަދާކޮށްފިއެވެ. އެމީހުން ބުނާ ގޮތުގައި ދިވެހީންނަކީ ހިތްހެޔޮ، އެކުވެރި އަދި އެއްބައިވަންތަ ބައެކެވެ.

ރާއްޖެއިން ލަންކާއަށް ވެދެއްވި އެހީތެރިކަމަށް ޝުކުރު އަދާކުރުމުގެ ގޮތުން، ރާއްޖޭގައި ދިރިއުޅޭ ލަންކާ ރައްޔިތުން މިއަދު ހަވީރު މާލޭގެ ބޮޑުތަކުރުފާނު މަގުގައި، މާލެ ސިޓީ ކައުންސިލްގެ އެކުވެނި ކައިރީގައި ވަނީ ސުލްހަވެރި އެއްވުމެއް ބާއްވާފައެވެ. މި މުހިންމު އިސްނެގުމުގައި ލަންކާގެ ގިނަ ރައްޔިތުން ބައިވެރިވެ، ޝުކުރުގެ ޕޯސްޓަރުތައް ހިފަހައްޓައިގެން ތިއްބެވެ. 

މި އެއްވުމުގެ ބޭނުމަކީ، ލަންކާއަށް ދިމާވި މޫސުމީ ކާރިސާގެ ސަބަބުން ހާލުގައި ޖެހިފައިވާ ރައްޔިތުންނަށް ރާއްޖެއިން ފޯރުކޮށްދިން އެހީތެރިކަމަށް ޝުކުރު އަދާކުރުމެވެ.

މި އެއްވުމުގައި ބައިވެރިވެވަޑައިގަންނަވަމުން ލަންކާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުހައްމަދު ރިޒްވީ ހަސަން މީޑިއާތަކަށް ދެއްވި އިންޓަވިއުއެއްގައި ވިދާޅުވީ، ލަންކާއަށް ދިމާވެފައިވާ ހިތްދަތި ދަނޑިވަޅުގައި ރާއްޖެއިން ދިން އެހީތެރިކަން ތާރީހުގައި ރަން އަކުރުން ލިޔެވޭނެ ކަމަށެވެ. އަދި އެ އެހީތެރިކަމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށާއި، ދިވެހި ސަރުކާރަށާއި، އަމިއްލަ ވިޔަފާރިވެރިންނަށާއި ދިވެހި ރައްޔިތުންނަށް ވަރަށް ބޮޑަށް ޝުކުރު އަދާކުރައްވާ ކަމަށް ސަފީރު ވިދާޅުވިއެވެ.

"ލަންކާއާއި ރާއްޖެއާ ދެމެދު މި އޮތް ގުޅުން އެއްވެސް މީހަކަށް އަދި އެއްވެސް ފަރާތަކަށް ބައިބައި ނުކުރެވޭނެ. މި ގުޅުމަކީ، ދުވަހަކުވެސް ބައިބައިވާނެ ގުޅުމެއް ނޫން. މި ސަރަހައްދުގައި ލަންކާއާ އެންމެ ގާތް ގުޅުމެއް ބާއްވަމުން އަންނަ ޤައުމަކީ، ރާއްޖެކަން މި އެހީތެރިކަމުން ދައްކުވައިދީފި،" ސަފީރު ވިދާޅުވިއެވެ.

މި އެއްވުމުގައި ބައިވެރިވި ލަންކާ ރައްޔިތެއް ކުރެއްވި ޓްވީޓެއްގައި ވަނީ، ކަމެއް ދިމާވާ ހިނދު ދިވެހިންނަކީ އެކުވެރި އެއްބައިވަންތަ ބައެއްކަން ހާމަވެގެން ދިޔަ ކަމަށް ބުނެފައެވެ. އަދި މިވަގުތު ލަންކާގައި ދިރިއުޅޭ ރައްޔިތުންނާއި ރާއްޖޭގައި ދިރިއުޅޭ ލަންކާއަށް ނިސްބަތްވާ ހުރިހާ ބޭފުޅުންގެ ހިތްތަކުގައި ވަނީ ރާއްޖެއަށް ޝުކުރުގެ ތައުރީފާއި ހެޔޮ ދުއާ ކަމަށްވެސް އެ މެސެޖުގައި ބުނެފައިވެއެވެ.

އެއްވުމުގައި ބައިވެރިވި އިތުރު ލަންކާ ރައްޔިތަކު ވިދާޅުވީ، "ލަންކާ އަލުން ކޮޅަށް ޖެހި ގެއްލުންތަކުން އަރައިގަންނަން މަސައްކަތް ކުރަމުން މިދާ ދަނޑިވަޅުގައި، ދިވެހިންގެ ފަރާތުން އަޅުގަނޑުމެންނަށް ވަރަށް ބޮޑު އެއްބާރުލެއްވުން ލިބެމުންދޭ. މިއަދު ސްރީލަންކާގައި ދިރިއުޅޭ ރައްޔިތުން ތިބީ ރާއްޖޭގެ ރައްޔިތުންނަށް ޝުކުރު އަދާކުރުމުގައި. ކުރުކޮށް ދަންނަވާނަމަ، ދިވެހީންނަށް ޝުކުރިއްޔާ! އަޅުގަނޑުމެންގެ ވަރަށްގިނަ އަދަދެއްގެ މީހުން މިއަދު މިތަނަށް ނާދެވުނީ އެކި ރަށްރަށުގައި މަސައްކަތް ކުރާތީ."

ލަންކާ ރައްޔިތުން ބުނާ ގޮތުގައި ރާއްޖެއަކީ މިހާރު އެމީހުންގެ ދެވަނަ ގެއެވެ. އަދި ކަމެއް ދިމާވެ އެހީއަކަށް ބޭނުންވާ ވަގުތު ކުރެވެން ހުރި ހުރިހާ މަސައްކަތެއް ކުރައްވާނެ ކަމަށްވެސް ލަންކާ ރައްޔިތުން ވަނީ ބުނެފައެވެ.

ތޫފާން ޑިޓްވާގެ ސަބަބުން ލަންކާއަށް ކުރިމަތިވި ނުރައްކާތެރި މޫސުމީ ހާލަތުގެ ސަބަބުން ގެއްލުން ލިބުނު ފަރާތްތަކަށް އެހީތެރިވުމުގެ ގޮތުން ރާއްޖެއިން ވަނީ ބޮޑެތި އެހީތައް ފޯރުކޮށްދީފައެވެ. އެގޮތުން، ރާއްޖެއިން ހަދިޔާކުރި 25,000 ކޭސް މަސްދަޅު މިއަދު ލަންކާއަށް ގެންގޮސްފައިވާއިރު، މި މަސްދަޅު ކޭސް ލަންކާއާ ހަވާލުކުރެއްވީ ކޮލޮމްބޯގައި ހުންނަ ރާއްޖޭގެ ހައިކޮމިޝަނަރެވެ. މީގެ އިތުރުން ދިވެހި ސަރުކާރުން ވަނީ ލަންކާއަށް 50,000 ޑޮލަރުގެ މާލީ އެހީއެއްވެސް ހަދިޔާ ކުރައްވާފައެވެ.

އަދި ލަންކާއަަށް އެހީވުމަށް ޕަބްލިކް ސަރވިސް މީޑިއާ (ޕީއެސްއެމް) އިން އިސް ނަގައިގެން ރާއްޖޭގެ ގިނަ މީޑިއާތަކަކާ ގުޅިގެން ކުރިއަށް ގެންދިޔަ "ސިލޯނާއެކު ދިވެހީން" ޓެލެތޯނަށްވެސް 800,352 ޑޮލަރު ނުވަތަ 245 މިލިއަން ލަންކާ ރުޕީސް ވަނީ ލިބިފައެވެ. ޓެލެތޯނާއި، ދިވެހި ސަރުކާރުގެ އިތުރުން އަމިއްލަ ދިވެހި ވިޔަފާރިވެރިން ފޯރުކޮށްދިން އެހީތަކާއެކު ރާއްޖެއިން ލަންކާއަށް ވި އެހީތެރިކަން ޖުމްލަ 2.4 މިލިޔަން ޑޮލަރަށް އަރައެވެ.

ލަންކާ ރައްޔިތުންގެ ހިތްތަކުގައި ދިވެހީންނަށް ޝުކުރު: 'ދިވެހީންނަކީ ހިތްހެޔޮ ބައެއް

ޝަރީއަތް ނިމެންދެން ބަންދުގައި މިވަގުތު 347 މީހުން ތިބިކަމަށާއި، މީގެތެރޭގައި ގިނައީ ބޮޑެތި ކުށްތަކުގެ ތުހުމަތުގައި ބަންދުކޮށްފައި ތިބި މީހުންކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ. އެކަންކަން ރަނގަޅަށް ބެލުމެއްނެތި އެމީހުން ދޫކޮށެއް ނުލެވޭނެކަމަށް ރައީސް ފާހަގަކުރެއްވިއެވެ.

ރައީސް މިހެން ވިދާޅުވީ، މާފަންނު ރައްޔިތުންނާ ބައްދަލުކުރެއްވުމުގެ ތެރެއިން އާއްމު ރައްޔިތަކު ފާޅުކުރެއްވި ކަންބޮޑުވުމަކަށް ޖަވާބުދެއްވަމުންނެވެ. ވަނުވާ ބަންދުގެ މައްސަލަ މީގެ ކުރިން އޮތީ އެއްގޮތަކަށްވެސް "ވާ ނުވާ ނޭނގޭ" މައްސަލައެއްގެ ގޮތުގައި ކަމަށް ރައީސް ވިދާޅުވިއެވެ. އެކަން އެހެން ވެފައި އޮތީ ކްރިމިނަލް ކޯޓާއި ޑްރަގް ކޯޓު ހިންގުމަށް އެކަށީގެންވާ ވަސީލަތްތައް ހަމަނުޖެހި، މައްސަލަތައް ފުނި ޖެހުމުން ކަމަށް ރައީސް ވިދާޅުވިއެވެ.

މި ސަރުކާރުން ވަރަށް ބޮޑަށް މަސައްކަތް ކޮށްގެން މި ދެ ކޯޓު ހިންގާނެ ތަން ހަމަޖައްސައިދީފައިވާ ކަމަށް ރައީސް ވިދާޅުވިއެވެ. އޭގެ ނަތީޖާއަކީ ޝަރީއަތް ހިނގާނެގޮތް އެއްވެސް ގޮތެއް ނޭނގި ވާނުވާގައި ތިބި މީހުންގެ ޝަރީއަތް ކުރެވޭނެ ދުވަހާއި، މި މައްސަލަތައް އަވަހަށް ބެލޭނެ ގޮތް ހަމަޖެހިގެން ދިއުން ކަމަށް ރައީސް ފާހަގަކުރެއްވިއެވެ.

"މިހާރު ވަރަށް ގިނަ މައްސަލަތައް ހައްލުކުރެވި ވާނުވާ ފުނިޖެހިފައި ހުރި މައްސަލަތައް ބެލެމުން އެދަނީ. ކުރީގައި ކެޕޭސިޓީ ނެތީ. ޖާނަ ނެތީމަ ނުބެލިފައި ހުރި ކަންތައްތައް." ރައީސް ވިދާޅުވިއެވެ.

ރައީސް ވިދާޅުވި ގޮތުގައި މިވަގުތު ވާނުވާ ބަންދުގައި ތިބި 347 މީހުންނަކީ މީހުން މެރުން، ޓެރަރިޒަމް، ކުޑަކުދިންނަށް ޖިންސީ ގޯނާކުރުން، މާރާމާރީ ހިންގުން، އަދި މަސްތުވާތަކެތީގެ ވިޔަފާރިކުރުން ފަދަ ބޮޑެތި ކުށްތަކުގެ ތުހުމަތުގައި ތިބި މީހުންނެވެ. އަދި އެކަންކަން ރަނގަޅަށް ނުބަލައި، އެމީހުން ހަމަ ހުރެފައި ދޫކޮށްލަން އެއްވެސް ރައްޔިތަކު ބޭނުންވާނެތޯ ރައީސް ވަނީ ސުވާލުކުރައްވާފައެވެ.

މިރޭގެ ބައްދަލުވުމުގައި ރައީސް ވަނީ ވާނުވާ ބަންދުގައި ތިބި މީހުންގެ ތަފްސީލްތައްވެސް ހާމަކުރައްވާފައެވެ:

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ، ޖުޑިޝަރީ މިނިވަންކޮށް މި ގެންނަ ބަދަލުތަކުގެ ސަބަބުން ވާނުވާ ބަންދުގެ މައްސަލައަށް ޙައްލު ލިބޭނެ ކަމުގެ ވަރަށް ބޮޑު ޔަޤީންކަމެއް އެބައޮތްކަމަށެވެ.

ޝަރީއަތް ނިމެންދެން ބަންދުގައި ތިބީ 347 މީހުން؛ ކުށުގެ ގޮތުން އެހާފަސޭހައިން ދޫކޮށެއް ނުލެވޭނެ

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވީ، އަންނަ އަހަރުގެ ތެރޭގައި ހުޅުމާލޭ ހޮސްޕިޓަލްގައި އެޑްމިޓްކޮށްގެން ނަފްސާނީ ބަލިތަކަށް ފަރުވާދެވޭނެ ޚިދުމަތް ފެށޭނެ ކަމަށާއި، މާލެ ސަރަޙައްދުގެ ޞިއްޙީ ޚިދުމަތްތައް އިތުރު ހަރުފަތަކަށް ޖެހޭނެ ކަމަށެވެ.

މިކަން ހާމަކުރައްވަމުން ސީއީއޯ އިބްރާހީމް ޢަބްދުއްރައްޒާޤް ޙަލީމް ވާހަކަދެއްކެވީ ޕީއެސްއެމް ނިއުސްގެ "ހަފްތާ 104" ޕްރޮގްރާމްގައެވެ. އަންނަ އަހަރަށް ލަފާކުރާ ދައުލަތުގެ ބަޖެޓުގައި އެންމެ ބޮޑު އިންސައްތައެއް ކަނޑައަޅާފައިވާ އެއް ދާއިރާއަކީ ޞިއްޙީ ދާއިރާއެވެ. 8 ބިލިޔަން ރުފިޔާގެ ބަޖެޓެއް ޞިއްޙީ ދާއިރާއަށް ކަނޑައަޅާފައިވާއިރު، ޢުމްރާނީގޮތުން ވަޞީލަތް ހޯދުމަށް މި ބަޖެޓުގެ ތެރެއިން ގިނަ މަސައްކަތްތަކެއް ކުރުމަށް ސަރުކާރުންވަނީ ނިންމަވާފައެވެ. ސީއީއޯ ވިދާޅުވީ، މި ބަޖެޓުގެ ތެރެއިން މާލެ ސަރަޙައްދުގެ ހޮސްޕިޓަލްތަކުގައި މުހިންމު ގިނަ މަސައްކަތްތަކެއް އަންނަ އަހަރު ކުރުމަށް ނިންމާފައިވާކަމަށެވެ.

އޭގެ ތެރޭގައި، ވިލިމާލޭ ހޮސްޕިޓަލް ތަރައްޤީކުރުމަށްޓަކައި ވަގުތީގޮތުން ހޮސްޕިޓަލްގެ ޚިދުމަތް ހުޅުމާލޭ ހިޔާއަށް ބަދަލުކުރުމުގެ މަސައްކަތް ކުރަމުންދާ ކަމަށާއި، އެސެޓަޕްގައި އިތުރު ޚިދުމަތްތައް ފެށުމަށް ހަމަޖެހިފައިވާ ކަމަށް ސީއީއޯ ވިދާޅުވިއެވެ. މީގެ އިތުރުން، ހުޅުމާލޭ ހޮސްޕިޓަލުގައިވެސް މުހިންމު މަސައްކަތްތަކެއް ކުރުމަށް އަންނަ އަހަރަށް ޕްލޭންކޮށްފައިވާއިރު، މުހިންމު ގިނަ ޚިދުމަތްތަކެއް އަންނާނެ ކަމަށް އޭނާ ވިދާޅުވިއެވެ. އެގޮތުން، އިތުރު އެނދުތައް ޤާއިމުކުރުމަށް ހަމަޖެހިފައިވާއިރު، ބައެއް އިތުރު ޚިދުމަތްތައް ފެށުމަށްވެސް ތައްޔާރުވަމުންދާ ކަމަށާއި، ހާއްސަކޮށް މެންޓަލް ހެލްތުގެ ދާއިރާ ފުޅާކުރުމަށް ނިންމާފައިވާކަމަށް ސީއީއޯ އިބްރާހީމް ޢަބްދުއްރައްޒާޤް ޙަލީމް ވަނީ ހާމަކުރައްވާފައެވެ.

ޙަބަރު